Fekoskan

Maneho pa Desaroyo di Kooperativa

Resientemente, gobièrnu di Kòrsou a adoptá un Maneho pa Desaroyo di Kooperativa (Cooperative Development Policy, CDP). Ta trata akí di e promé maneho di e tipo akí den historia di e movementu kooperativista na Kòrsou. E maneho ta introdusí algun aserkamentu nobo i e rekursonan finansiero nesesario pa por implementá nan. Huntu ku esei, e ta introdusí tambe sierto medida di sosten, adaptá spesífikamente na e ambiente kooperativista. E maneho nobo ta duna rekonosementu na e papel klave ku kooperativa por hunga den ekonomia i ta atendé e problemanan spesífiko ku e organisashonnan akí ta enfrentá. Di e manera ei, e ta garantisá un desaroyo armonioso di kooperativismo na Kòrsou.

E ophetivo prinsipal di e maneho akí ta di reafirmá e karakter distintivo di kooperativa, den lus di e retonan ekonómiko i sosial ku Kòrsou ta enfrentando. Ademas, e maneho ta na armonia ku e rekomendashonnan di Organisashon Internashonal di Labor (ILO), publiká na yüni di 2002, ku ta duna sosten na kooperativismo. ILO a proponé pa e gobièrnunan ‘ofresé un maneho i kuadro legal pa sostené kooperativa, ku ta kuadra ku nan naturalesa i funshonamentu, i ku ta guiá pa e balor- i prinsipionan kooperativista fihá den e Aliansa Kooperativista Internashonal’ (rekomendashon 193, ILO 2002). Ku e maneho akí, gobièrnu di Kòrsou a demostrá su determinashon pa apoyá kooperativa, di manera ku e empresanan akí por posishoná nan mes firmemente pa por superá e retonan supstansial ku nan ta enfrentá, i kontribuí na asta mas empleo i prosperidat. Meta di e maneho ta di amplia posishon di kooperativa den ekonomia na Kòrsou.

No por mira fomento di kooperativa lòs for di e maneho- i programanan di desaroyo mas general di pais. Gobièrnu ta konsiente di e vínkulo ku ta eksistí entre maneho pa desaroyo di kooperativa i e otro plannan pa desaroyo nashonal, ku e maneho pa desaroyo di kooperativa mester bai forma parti di dje. Ta mira promoshon di kooperativa komo un di e diferente aspektonan di desaroyo ekonómiko i sosial di Pais.

E dokumento di maneho ta resultado di un proseso intensivo di konsulta ku a inisiá na mei di 2019, na momento ku gobièrnu di Kòrsou a adoptá un Dekreto Ministerial pa lanta un Task Team multidisiplinario. Pa logra e meta akí, e ministerionan a traha interministerialmente i ku organisashonnan privá. Den e proseso, tabata enbolbí: Ministerio di Desaroyo Ekonómiko, Ministerio di Finansa, Ministerio di Salubridat, Medio Ambiente i Naturalesa, Ministerio di Enseñansa, Siensia, Kultura i Deporte, Ministerio di Desaroyo Ekonómiko, Labor i Bienestar, ADECK i FEKOSKAN. E responsabilidat pa e maneho pa desaroyo di kooperativa ta den man di Ministerio di Desaroyo Ekonómiko (MED).

E Task Team multidisiplinario a organisá kuater tayer i un Diálogo Demokrátiko Nashonal. Meta prinsipal di e diálogo demokrátiko (DD) tabata pa optené informashon i definí e prioridatnan di maneho.

E akshonnan stratégiko riba término mediano i largu ta:

1. Introdusí un kuadro legal efektivo i inovativo.
2. Bini ku mas i mihó edukashon, training i informashon riba kooperativismo.
3. Desaroyá òf mehorá hèrmènt di kapitalisashon i finansiamentu adekuá pa e ambiente kooperativista.
4. Mehorá e servisionan di sosten empresarial no finansiero ku e kooperativanan tin na nan disposishon.
5. Rekonosé e papel di kooperativa, integrando i armonisando e akshonnan di gobièrnu riba tereno di desaroyo di kooperativa.
6. Amplia regulashon di kooperativa finansiero.
7. Fomentá investigashon i inovashon den sektor kooperativista.
8. Amplia uso di teknologia adekuá den kooperativa.
9. Adoptá práktika di bon maneho (good governance) kooperativista.
10. Atraé hóben na e movementu kooperativista.
11. Krea demanda pa produkto i servisio di kooperativa.