Filosofia, balor i prinsipionan di kooperativa mester prevalesé

Willemstad – Kooperativa Fekoskan, e federashon di kooperativanan di spar i krédito, a tuma nota ku último tempu ta reina bastante inkietut bou di miembronan (sosionan) di e kooperativa di spar i krédito ACU. Fekoskan, komo organisashon representativo di e seis (6) kooperativanan di spar i krédito na Kòrsou, tin komprenshon pa e sentimentunan ku ta reina. Pa e motibu ei Fekoskan ke pidi sosionan i dirigentenan di ACU pa laga nan mes wòrdu guiá pa e spiritu i filosofia di kooperativa durante e prosesonan demokrátiko ku e kooperativa ta pasa aden. Balornan manera outo-responsabilidat, demokrasia, solidaridat, hustisia sosial, igualdat, honestidat i transparensia mester prevalesé pa por tuma desishonnan ku ta tene kuenta ku e interes di kada sosio di e kooperativa.

Pa lei i prinsipionan di kooperativa e proseso demokrátiko ku mester tuma lugá djadumingu awor den ACU ta un asuntu interno di e kooperativa i su sosionan ku ta e doñonan di e kooperativa. Fekoskan, na promé lugá i konforme e prinsipio di kooperativa, ta respetá outonomia i independensia di kada un di su afiliadonan. Ademas, konforme e statutonan vigente di Kooperativa Fekoskan, Fekoskan no tin e meta, ròl ni e tarea pa fungi komo supervisadó ni kontroladó di su 6 afiliadonan.

E ròl i tarea di supervisadó i kontroladó di sektor finansiero na Kòrsou, inkluso esun di kooperativanan di spar i krédito ta un ku ta ankrá den lei i ta Banko Sentral di Kòrsou i St. Maarten (CBCS) ta esun enkargá ku esei. Komo organisashon representativo Kooperativa Fekoskan no ta dispone di akseso na informashon relashoná ku kontrol i supervishon ehersé dor di CBCS na ACU.

Pa e motibunan ariba menshoná Fekoskan no por duna komentario riba e kontenido di medidanan ku e supervisor supuestamente a òf ta imponé riba ACU. Lokual ku si Fekoskan a i ta sigui boga p’e tantu serka CBCS komo gobièrnu di Kòrsou ta pa: a) den formulashon i ehekushon di maneho tene debido kuenta ku e karakter úniko di kooperativanan di spar i krédito, un ke otro manera formulá den resolushon 2002-193 di International Labour Organization (ILO) i ratifiká dor di Gobièrnu di Kòrsou na e momento ku a bira miembro di International Cooperative Alliance (ICA). b) Pa no trata institutonan finansiero kooperativo manera ta banko komersial nan ta. c) Pa tene debido kuenta ku e funshon di e institutonan finansiero kooperativo aki komo instrumentonan klave pa logra inklushon finansiero di gruponan ménos fuerte den nos komunidat.

Finalmente, Kooperativa Fekoskan ta refutá tur klase di insinuashon den direkshon di Fekoskan ku Fekoskan lo por tin di aber ku e situashon reinante na un di su afiliadonan. Kooperativa Fekoskan ta un organisashon demokrátiko, ku ta ser manehá konforme e balornan i prinsipionan di kooperativa. Desishonnan i akshonnan tumá den Fekoskan ta surgi a base di prosesonan demokrátiko ku ta tene kuenta ku interesnan di tur su afiliadonan i nan sosionan. Fekoskan ta keda na disposishon pa, si ta nesesario i riba petishon di partidonan, intermediá entre e partidonan enbolbí.

Fekoskan ta deseá sosionan i dirigentenan di ACU hopi sabiduria djadumingu 10 di yüli awor durante nan Reunion General. Nos ta konfia ku e spiritu kooperativista lo prevalesé i ku den un ambiente di transparensia, honestidat i rèspèt mutuo sosionan por dialogá ku otro i yega na desishonnan ku ta na benefisio di tur sosionan, e kooperativa ACU i kooperativismo na Kòrsou en general.