Kooperativa di bibienda

Un kooperativa di bibienda ta un korporashon kontrolá demokrátikamente, lantá pa ofresé su sosionan un lugá di biba. Kada kas di famia ta doño di un akshon den e korporashon i e akshon ta dun’é derecho di okupá un unidat di bibienda. Normalmente, ta finansiá e kooperativa mediante un hipotek general riba henter e propiedat, i e sosionan ta paga tur luna pa kubri e pagonan di hipotek i gastu di operashon.

 

Un kooperativa di bibienda ta kumpli ku sierto nesesidat di su sosionan. Por usa e modelo kooperativista pa kas di un solo bibá, apartamento, i kualke tipo di edifisio di bibienda. Kooperativa di bibienda por asta ofresé opshon mas luhoso pa esnan relativamente pudiente, i produkto basá riba nesesidat di esnan ku no por afòrt un kas na preis di merkado.

Kooperativa di Bibienda di Kapital Limitá

ta ofresé famia ku entrada abou òf mediano e posibilidat di tin nan propio kas na un manera pagabel. E sosionan ta finansiá desaroyo di e tipo di kooperativa akí kombinando finansiamentu privá i di gobièrnu. Generalmente, preis di e akshonnan di e kooperativanan akí ta abou, i e famianan ku ta miembro no tin mag di tin mas ku un akshon kada un. Ademas, pa yuda tene e preisnan pagabel i evitá komprabenta spekulativo, e kooperativa ta fiha preis máksimo pa ora di rebendé e akshonnan.

Un kooperativa di Bibienda na Preis di Merkado ta operá riba merkado privá. E kooperativanan akí, konosí na ingles tambe komo ‘stock cooperatives’, ta organisá finansiamentu privá di kompra di akshon. Ora un miembro sali for di e bibienda, ta bende e akshon na su preis total riba merkado. Den statüt di e kooperativa, e sosionan por stipulá, por ehèmpel, ku ta e doñonan di e bibienda so tin mag di biba den dje òf ku ta mara hürmentu di e unidat di bibienda na sierto kondishon.

Un kooperativa di Parke di Bibienda Prefabriká ta permití su miembronan kontrolá preis, i partisipá den operashon, maneho i mantenshon di e parke. E bibiendanan prefabriká ta propiedat privá, pero e kooperativa ta doño di e tereno ku tin bou di e bibienda i di e otro fasilidatnan. E sosionan ta kopropietario di e parke i tin derecho di okupá un espasio pa pone nan bibienda. Kooperativa di Parke di Bibienda Prefabriká por sea traha a base di e preisnan vigente riba merkado òf fiha sierto límite di kapital pa asina tene e bibiendanan pagabel.

Un kooperativa di Bibienda pa Hende di Edat ta traha pa kumpli ku nesesidat di e sosionan ku ta kumpli ku sierto rekisito pre-establesí relashoná ku nan edat. E bibiendanan ta adaptá na e nesesidatnan ku por presentá segun ku un hende su edat ta subi. Den un komunidat asina, por tin sala kolektivo, gym, pisina i parke; tur e opshonnan ku sa ta disponibel na un kompleho pa hende di sierto edat. Tambe, e komplehonan por ofresé diferente grado di kuido. E bentaha di e modelo kooperativista ta ku e ta permití e sosionan di ta doño di nan bibienda i tuma desishon demokrátikamente. Ademas, e ta garantisá ku e personanan di edat tin di bisa den tur aspekto di bida di e komunidat.