Kooperativa di Komestibel

Generalmente, ta e konsumidónan ta miembro-propietario di kooperativa di komestibel, pero tin algun di e kooperativanan akí ku ta den man di e trahadónan, òf kaminda e poder di tuma desishon ta den man di tantu e trahadónan komo e konsumidónan.

Kooperativa di komestibel ku ta den man di konsumidó ta wòrdu lantá pa por kontrolá e tipo i kalidat di produkto disponibel i haña esakinan na preis mas abou. Algun di nan ta den forma di supermerkado detayista ku un òf mas establesimentu òf grupo di kompra ku ta konsistí di algun sentenar di miembro. Hopi supermerkado kooperativista a kuminsá komo klup chikitu di kumpradó ku a desaroyá i bira kooperativa ku nan propio tienda, segun ku nan membresia a krese.

Banda di e benefisionan ekonómiko di kumpra komestibel komo kooperativa, e organisashonnan akí ta konsentrá tambe riba kalidat nutrishonal di e alimentonan i riba método di produkshon i distribushon alternativo ,manera marka orgániko i komèrsio liber, i ta duna informashon i edukashon pa nan miembronan por skohe na un manera bon informá.

E miembronan di kooperativa di komestibel ta elegí un direktiva demokrátikamente i esaki ta tuma desishon di maneho pa e kooperativa. Mayoria di tienda kooperativista ta kontratá un manager pa supervisá maneho diario di e tienda. Normalmente, e kooperativanan akí ta pèrmití tur hende hasi kompra na nan tienda, pero ta ofresé nan miembronan deskuento i ‘dividendo di patronahe‘. Dividendo di patronahe ta e parti di e ganashi di fin di aña ku e miembro ta haña a base di e kantidat di kompra ku el a hasi den e temporada ei. Tin kooperativa ku ta ofresé deskuento na e miembronan ku ta kontribuí nan tempu na e kooperativa riba un base boluntario.

Ademas di kooperativa ku tin nan propio tienda, tin tambe klup di kompra. Den e modelo akí, un grupo di kas di famia ta sera kabes i kumpra komestibel por mayor, pa por haña esaki na preis mas abou i optené komestibel ku normalmente no ta disponibel kaminda nan ta biba. hopi bes Generalmente, e miembronan mes ta manehá e klup di kompra, hopi bes riba un base boluntario.