Prinsipio kooperativista

Kooperativanan di rònt mundu ta operá a base di e mesun prinsipio i balornan básiko adaptá na 1995 dor di Aliansa Kooperativa Internashonal (International Cooperative Alliance). Rais di e prinsipionan i balornan a keda buta dor di e promé kooperativa moderno na Rochdale Inglatera na aña 1844.

#1 Miembresia voluntario i habrí
Kooperativanan ta organisashonnan di voluntario habrí pa tur hende ku ta kapas pa hasi uso di su servisionan i ku ta dispuesto pa aseptá e responsabilidatnan ku e miembresia ta trese kuné, sin diskriminashon di género, sosial, rasial, polítiko o di religion.

#2 Kontrol demokrátiko dor di miembro
Kooperativanan ta organisashonnan demokrátiko, kontrolá i dirigí pa nan miembronan (esnan ku ta kumpra produktonan òf ta hasi uso di e servisionan ku e kooperativa ta ofresé). I esnan ku ta partisipá aktivamente den toma di desishon i formulashon di maneho. Miembronan ku a keda elegí pa sirbi komo representante tin ku responsabilisá nan aktuashon na miembresia. Den kooperativanan primaria miembronan tin mesun derechonan di voto ( un voto pa kada miembro) i organisá demokrátikamente.

#3 Partisipashon ekonómiko
Miembresia ta kontribuí di forma ekivalente i ta kontrolá demokrátikamente e kapital di nan kooperativa. Por lo ménos un parti di e kapital ei ta propiedat komun di e kooperativa. Miembronan en general por risibí un kompensashon limitá (si ta posibel i si tin) di e kapital destiná komo kontribushon di miembresia. Por destiná surplus di kapital pa e siguiente metanan: desaroyo di kooperativa, kreashon di reserva (di kual un parti no por wòrdu repartí), pa benefisio di sosionan na proporshon di nan kontribushon, i pa duna sosten na aktividatnan aprobá dor di reunion general.

#4 Outonomia i independensia
Kooperativanan ta organisashonnan outónomo, basá riba e prinsipio di yudansa mutuo, i ku ta wòrdu kontrolá pa nan miembresia. Si kooperativananan sera akuerdonan di kooperashon ku otro organisashon inkluyendo instansianan gubernamental òf fia kapital di fuentenan eksterno esaki mester sosodé riba términonan ku ta garantisá kontrol demokrátiko di nan miembresia, i outonomia di e kooperativa.

#5 Edukashon, Formashon i informashon
Kooperativanan ta proveé edukashon i formashon pa nan miembresia, dirigentenan, gerente i empleado ku ta kontribuí efektivamente na desaroyo di nan kooperativa. Tambe kooperativanan ta informá públiko en general – spesialmente hóben i influensiadónan di opinion – di karakterístika i benefishinan di kooperativa.

#6 Kooperashon entre kooperativanan
Kooperativanan ta sirbi nan miembronan mas efektivo posibel i yuda fortifiká e movementu kooperativa a traves di strukturanan riba nivel lokal, nashonal, regional i internashonal.

#7 Duna bek na komunidat
Miéntras ku ta enfoká riba nesesidat di miembresia, kooperativanan ta traha tambe riba desaroyo sostenibel di nan komunidat pa medio di un maneho aprobá dor di miembresia.