Kooperativa di Agrikultura

Kooperativa di agrikultura ta yuda kunukero uni forsa ora di merkadiá nan kosecha pa asina haña mas poder den merkado, alkansá ekonomia di eskala pa asina oumentá nan poder den negosiashon, prosesá nan materia prima pa asina generá mas balor, i kumpra e produkto- i servisionan ku nan tin mester. E benefisionan i ganashi di e kooperativa ta keda distribuí na un manera hustu bou di e kunukeronan sosio, basá riba kuantu nan a usa e kooperativa.

Un kooperativa ta un organisashon ku ta den man i bou di kontrol di esnan ku ta usa su produkto- i servisionan, i hopi di e produktonan ku e ta ofresé ta artíkulo bon konosí ku ta disponibel den rèki di supermerkado pa añanan kaba. Kòrsou tin aproksimadamente sinku (5) kooperativa di agrikultura.

Kooperativa di merkadeo, suministro i servisio ta e tiponan di kooperativa agrikultural mas frekuente rònt mundu. Ta trata di Kooperativa di merkadeo, suministro i servisio. Kooperativa di merkadeo ta asamblá, empaketá, prosesá i bende e produktonan di nan sosionan riba merkado lokal i internashonal. E sosionan produktor ta uni forsa i asina garantisá ku ‘tin un kas pa nan produkto’ i ku nan no tin ku preokupá individualmente ku kada un di e aspektonan di produkshon i benta.

Kooperativa di suministro ta kumpra produkto i servisio pa nan sosionan. E sosionan ta kumpra simia, fertilisante, produkto pa kontrol di pèst, etc. na kantidat grandi, pa por haña esakinan na mihó preis. Kooperativa di servisio ta ofresé nan sosionan servisio spesialisá, manera maneho di empresa, maneho di tou, i konseho hortikultural, ku den hopi kaso no ta ekonómiko pa un kunukero individual.

Aki ta sigui algun diferensia entre kooperativa di agrikultura i otro tipo di negoshi:

• E kunukeronan sosio mes ta doño.
• Ademas, e kunukeronan, ku ta e doño- i klientenan di e negoshinan akí, ta kontrolá nan kooperativa demokrátikamente. E sosionan ta elegí un direktiva ku ta fiha e maneho general pa funshonamentu di e kooperativa, aprobá e presupuesto anual, i supervisá e gerensia. E gerensia ta implementá e prosedimentunan ku e direktiva a fiha i ta na enkargo di maneho diario di e kooperativa.
• E kooperativa ta distribuí e benefisionan ekonómiko bou di su miembronan a base di kuantu e sosio a usa e kooperativa (por ehèmpel: mas produkto bo tabatin, mas benefisio ekonómiko bo ta saka).
• E sosionan produktor ta saka benefisio di e kooperativa den nan kalidat di usuario, no di invershonista. Komo kopropietario, e sosionan di un kooperativa ta responsabel konhuntamente pa e gastunan di operashon, ekspanshon i emergensia imprevisto di e negoshi.