Kooperativa di Trahadó

Un kooperativa di trahadó ta un negoshi manehá demokrátikamente, ku ta den man i bou di kontrol di e empleadonan. Kooperativismo ta permití hende di pueblo uni nan forsa, kapital i abilidatnan pa por tin un trabou i entrada fiho, ser propietario di e negoshi, i partisipá den maneho i den ganashi a base di nan invershon i nan labor.

Si nos wak historia, e promé kooperativanan di trahadó a lanta den e dékada di 1790 na Estádos Unídos i den e dékada di 1760 na Inglatera. Awendia, tin kooperativa asina rònt mundu.

Komo sosio di e kooperativa, e empleadonan ta partisipá den toma di desishon ku ta afektá kon nan trabou ta wòrdu organisá, efektuá i manehá. Pero tambe nan ta yuda determiná kuantu e negoshi lo krese i kuantu éksito e lo tin. Normalmente, e trahadónan ta risibí un suèldu fihá pa e kooperativa. Banda di esei, nan ta partisipá den e ganashi (òf pèrdida) di fin di aña, a base di kuantu partisipashon nan tin den e kompania (por ehèmpel, kuantu ora nan a traha òf kuantu suèldu nan a gana).

Normalmente, un kooperativa di trahadó ta spera pa su sosionan:

• Traha huntu (na lugá di aktua komo kontratista independiente) den un negoshi ku ta propiedat di nan tur;
• Dirigí i kontrolá e empresa a base di un voto pa kada miembro, tumando desishon a base di konsenso òf via un otro struktura demokrátiko;
• Asumí tur riesgo i benefisio komo trahadó, doño i operadó di nan negoshi kooperativista;
• Kontribuí na kapital di nan kooperativa i benefisiá di dje na un manera hustu;
• Disidí kon ta distribuí e ganashi òf pèrdida neto.
• Un kolektivo di trahadó ta un variante di kooperativa di trahadó. Un kolektivo ta duna mas prioridat na e grupo i na e similaridatnan entre su miembronan. Un kolektivo ta tuma desishon a base di konsenso, aunke tin di nan kaminda, bou di sierto kondishon, por tuma desishon a base di dos terser parti òf un otro tipo di voto supermayoritario. Otro karakterístika di kolektivo di trahadó ta ku e pago i grado di outoridat di tur trahadó/sosio ta na un nivel similar.