Kooperativa Finansiero

Un Credit Union ta un organisashon kooperativa finansiero ku ta propiedat di e sosionan di e kooperativa, manehá na un manera demokrátiko ku e meta di maksimalisá e benefisio ekonómiko pa e sosionan.

Generalmente, un union di krédito ta fomentá sparmentu i ta ofresé tasa di interes kompetitivo riba fiansa. Hopi union di krédito tin un membresia ku tin un base komun. Por ehèmpel, e sosionan por tin e mesun okupashon òf e mesun dunadó di trabou, ta forma parti di e mesun asosiashon òf grupo religioso, òf ta biba den e mesun komunidat. Usualmente, e sosionan ta elegí e union di krédito su direktiva.

Na Kòrsou, e pioneronan di kooperativismo a lanta e promé union di krédito ku yudansa di Mgr. Dr. Amado Römer na 1958. E akontesementu akí a habri kaminda pa e desaroyo di union di krédito en general na Kòrsou. E kantidat di union di krédito a multipliká, pero despues di algun dékada, a baha bèk. Tin seis union di krédito na Kòrsou i huntu nan tin riba 32.000 sosio.