Kooperativa pa kuido di mucha

Hende por organisá kooperativa pa kuido di mucha i kuido pre-eskolar na diferente manera. Por ehèmpel, un grupo di empleado por forma un kooperativa ku ta ofresé servisio di kuido di mucha òf kuido pre-eskolar (wak Kooperativa di Trahadó).

Kooperativa di mayor ta un bon solushon pa mayor, ya ku e organisashonnan akí ta ofresé enseñansa pre-eskolar di kalidat i pagabel. E mayornan ta elegí un direktiva pa dirigí e kooperativa, fiha maneho i kontratá i supervisá personal kapasitá ku ta enkargá ku e trabounan diario. Hopi bes, e mayornan ta kontribuí un sierto kantidat di ora na e kooperativa sin risibí pago. Asina, nan ta redusí gastu i ta mihó na altura, i tin mas di bisa, tokante kuido di nan yu ora e no ta na kas. Tambe, nan tin mas chèns di interaktuá ku e otro mayornan.

Kooperativa di kuido pre-eskolar konosí tambe komo Parent Participation Nursery Schools (PPNS), a kuminsá na 1916. Na Universidat di Chicago, un grupo di mama a organisá un programa kooperativista pa ofresé nan yunan chikitu momentonan di eksperensia sosial i edukashonal, i pa e mayornan por tin tempu liber pa dediká na trabou boluntario. E kooperativanan moderno di kuido pre-eskolar ta ofresé aktividat paresido pa mucha di edat pre-eskolar; hopi bes, nan ta ofresé algun ora èkstra di kuido den kaso ku e mayor(nan) ta traha. E kooperativa ta traha a base di un programa sertifiká i tin un òf mas eksperto den edukashon pre-eskolar den servisio. Partisipashon di e mayornan ta yuda hisa kalidat di e programa i na mes momento ta baha e gastunan di operashon.

Kooperativa di kuido di mucha ta ofresé kuido di kalidat pa mucha na momento ku e mayornan ta trahando. Aunke hopi aspekto di kooperativa di kuido di mucha ta eksaktamente meskos ku di kooperativa di kuido pre-eskolar, kooperativa di kuido di mucha sa tin tres diferensia importante: nan ta ofresé kuido di henter dia, ta ofresé un parti mas supstansial di e kuido i ta eksigí bastante ménos partisipashon di mayor.

Kada bes mas tantu kooperativa di kuido pre-eskolar ta adaptá nan programa òf ta ofresé opshon èkstra pa mayor ku ta traha. Hopi di nan ta ofresé opshon pa kuido di yu ‘despues di kuido pre-eskolar’ i tin di nan ku ta laga kuidadó di yu òf wela tambe kumpli ku e rekisito- òf opshonnan di partisipashon parti anochi òf den fin di siman. Tambe, tin programa ku ta ofresé e sosionan e posibilidat di paga un tarifa mas haltu a kambio di baha nan oranan di partisipashon komo mayor.

Kooperativa pa kuido di yu ku sosten di doño di trabou

Kooperativa por ta un modelo balioso tambe pa kuido di yu na un lugá di trabou òf serka di dje. Den e modelo ku sosten di e doño di trabou, ta e mayornan na e lugá di trabou ta bira sosio i nan ta elegí e direktiva. Un sentro asina ta funshoná na un manera kasi idéntiko na e kooperativanan di mayor pa kuido di yu, deskribí anteriormente. E doño di trabou por duna su apoyo na e kooperativa, yudando ku e gastunan pa lanta e kooperativa i kontribuyendo finansieramente òf no finansieramente, por ehèmpel, permitiendo pa e kooperativa usa su awa i koriente, edifisionan i espasio pafó, mashin di kopia, servisio sekretarial i otro produkto i servisio.

Den un konsorsio pa kuido di mucha, ta e negoshinan ta sosio i no e mayornan. Nan ta uni forsa pa ofresé nan empleadonan kuido di mucha na un sitio ku ta keda serka di nan lugá di trabou. Den e modelo akí, e direktiva ta konsistí prinsipalmente di representante di e negoshinan ku ta miembro (i ku na mes momento por ta mayor tambe). E negoshinan miembro ta parti e gastu- i benefisionan di e programa. Normalmente, nan ta kobra e mayornan den nan servisio pa uso di e sentro.

Kooperativa pa servisio di babysit
Kooperativa pa servisio di babysit ta permití un grupo di mayor interkambiá servisio di babysit, nan ku nan, na un manera hustu pa tur esnan envolví, pa asina nan por haña chèns di sali de bes en kuando òf hasi un biahe di negoshi. E tipo di kooperativa akí ta ménos formal i e palabrashonnan ta wòrdu hasí riba un plaso relativamente kòrtiku. Ora un mayor wak pa yu di un otro famia ku ta miembro, e ta haña punto ku e por ‘troka’ ora e tin mester di servisio di babysit.