Fekoskan

Kiko ta hasi un identidat kooperativa diferente:

Kooperativanan ta entidatnan ku ta eksklusivamente propiedat di sosionan. Nan ta keda kontrolá dor di e sosionan i nan derecho di eksistensia ta sinta den ofresé nan sosionan sierto benefisio. Kooperativanan ta usa nan surplus pa por organisá aktividatnan na benefisio di nan sosionan. Otro tiponan di organisashon, ku ta propiedat di invershonistanan, ta usa aktividatnan pa hasi ganashi. Kier men di ku tin un diferensia fundamental: E bentaha di Kooperativa. E reto pa e direktiva di un kooperativa ta, kon pa logra e bentaha aki. E bentaha no nesesariamente mester resultá den benefisio pa e kooperativa mes.

TÓPIKO	KOOPERATIVA	ENTIDAT KU TA PROPIEDAT DI INVERSHONISTA
Miembresia	Miembresia ta habri pa tur hende ku ta apliká i ku ta bira usuario- klientenan -trahadó -suministradó (ta dependé di e tipo di kooperativa)	E invershon lo determiná e miembresia i posiblemente esaki no ta habrí pa un i tur pero limitá na esnan invitá.
Doño	Sosio (esnan ku ta hasi uso di servisionan di e kooperativa)	Invershonista ( en general no e usuario)
Invershon	Akshon emití dor di e kooperativa ta mantené nan balor nominal i un miembro no por kumpra akshon di otro.	Akshonnan en general ta kambia di doño entre akshonista kontra di balor di merkado.
Derecho di voto	Kada miembro, un voto: Ta referí aki na e miembro individual i no na e kantidat di akshon ku e miembro tin.	E kantidat di akshon ku kada invershonista tin ta determiná e voto i kontrol di e entidat.
Benefisio	Sosionan ta risibí benefisio di retorno na proporshon di e uso ku nan ta hasi di e servisionan ku nan kooperativa ta ofresé. Rendimentu en general no ta signifikante.	Akshonistanan ta risibí un parti di e ganashi di e entidat komo dividendo na proporshon di e kantidat di akshon ku nan ta poseé.
Rason di ser miembro	Miembresia en general ta pa atkerí un bentaha di ekonomia di eskala pa e aktividatnan komersial di e sosio por ehèmpel merkadeo, kompra por mayor. E bentaha komersial mayoria bia no ta bai pa e kooperativa pero ta bai direktamente den man di e miembro.	E invershon ta pa ganashi di kapital, dividendo.
Kondishon komersial	En general sosionan ta fiha e preis di kompra di tal manera ku e ta bira un kompromiso entre e preis mas abou posibel i e mihó rendimentu pa e usuario. Preis di benta na sosio en general ta entre e preis mas haltu i e gastu mas abou posibel. E faktor krítiko ta e faktibilidat ekonómiko di e aktividatnan empresarial di sosionan i e éksito di e kooperativa riba término largu.	E faktor kritiko ta, e preis di kompra mas abou posibel, i e preis di benta mas haltu posibel, huntu ku maksimalisashon di e ganashi p’e negoshi ku ta propiedat di e invershonista.

Bentaha kooperativa