Credit union: hende ta yuda hende!

Credit union: hende ta yuda hende!

Humanidat kompletu ta konfrontando un situashon nobo ku ta rekerí solidaridat di nos tur. COVID-19 ta un desafío ku ta obligá nos tur na kumpli estriktamente ku medidanan ku ta nesesario pa nos mes su salu, di nos famia, di amistatnan i di nos komunidat en general. COVID-19 tin tambe konsekuensianan pa e manera ku nos Credit Unionnan ta brinda servisio nan nan sosionan.

Credit Unionnan (kooperativanan di spar i krédito) semper a pone e nesesidat di nan sosionan na promé lugá. Den tempu di nesesidat sosionan, rònt mundu i aki na Kòrsou tambe, por sigui konta ku sosten di nan Credit Union. Nos ta sigur ku aworakí tambe nos kooperativanan i nan sosionan lo sa di adaptá na e situashon aktual i duna e mihó di nan mes pa huntu superá e periodo di prueba aktual okashoná dor di COVID-19.

Meimei di tur e insiguridat i preokupashon, ku COVID-19 a trese kuné, nos Credit Unionnan tei pa duna nan sosionan e sosten i apoyo nesesario. Pasombra e bienestar di e sosionan ta nos prioridat, nos por tin e siguransa ku nos Credit Unionnan tei pa, huntu ku nan sosionan, formulá e mihó manera pa asistí i sostené otro. Credit Unionnan ta keda fiel na e balornan i prinsipionan di kooperativa i ta sigui kumpli ku nan dimenshon sosial, ekonómiko i finansiero.

Ku tur e dolónan ku e por trese kuné, COVID-19 ta trese tambe oportunidat pa awor mas ku nunka nos ta mas serka di otro, yudando otro i protegiendo esnan mas débil meimei di nos. Fekoskan i Curaçao Cooperative Academy di nan parti tei na total disposishon pa apoyá tur esfuerso di parti di nos Credit Unionnan pa ta mas serka di nan sosionan, yudando e sosionan i nos komunidat en general pa superá e situashon aktual.

Konkretamente, fekoskan lo sigui yuda e Credit Unionnan pa nan fortifiká nan mes, sigui adaptá i sigui brinda mas i mihó servisio ku ta fit mihó ku e nesesidatnan aktual di nan sosionan. Banda di esaki lo sigui tambe ku esfuersonan pa promové lantamentu di mas kooperativanan di produkshon i di servisio pa asina yuda krea kuponan di trabou i kombatí pobresa. Pa hasi esaki posibel lo aserka partnernan sosial pa huntu nos ban krea e oportunidat i ambiente adekuá pa otro tiponan di kooperativa tambe por floresé i duna un aporte struktural i duradero na desaroyo sosial ekonómiko di Kòrsou. Ademas di esakinan Fekoskan lo traha riba un plan pa yuda ku finansiamentu di empresanan mikro, chikí i mediano.

Credit Unionnan i kooperativanan en general, a base di nan kompromiso ku nan sosionan i nan sentido di responsabilidat sosial, ta parti di e solushon pa e retonan sosial, ekonómiko i finansiero ku a surgi dor di COVID-19. Hende ta keda yuda hende!